هويت لي غرون من البيض فتان

هويت لي غرون من البيض فتان
كامل ولله العلو في كماله
ملاك ما يملك سوى طبع الانسان
وباقي الوصايف فيه وهبه لحاله
أمير ذوق وحس واحساس ولسان
وصاحب سمو بهيبته وبخياله
إليا وطى بخطاه لولو ومرجان
وإليا مشى يغار حتى ظلاله
وإليا وقف من هيبته كنه سلطان
والناس ترجيه العفو والعداله
وإليا هرج هرجه تباشير وألحان
وإليا سكت كله شموخ وجلاله
وإليا ابتسم تضحك متاهات الأحزان
وإليا ضحك بانت ملامح دلاله
وإليا طلب تتسابق الانس والجان
كلن يبي عسى الطلب له لحاله
وإليا وصل الأول طلب منه غفران
عساي ما تأخرت جيت بعجاله
سبحان ربي يا بشر فيه سبحان
كله حسن محدن يساوي جماله
شعره سواد الليل والعود رويان
والوجه مثل البدر ليلة كماله
والجسم كنه رسم مبدع وفنان
شكل على كيفه على ما طراله
والعين عين الظبي أوطير حوران
والخد براقن كشخ خلف شاله
والخشم كنه سلة السيف شامان
والمبسم الجذاب موت وظلاله
وإليا كشف عنه الغطا والنحر بان
كني شربت الخمر حد الثماله
وإليا تمايل بالخصر مطرق ألبان
بين علي عقلي مواري هباله
والملح مع زود الحلا صاروا اخوان
وتفرقوا مابين عمه وخاله
أرجو العفو باللي حصل فيه نقصان
أموت ويموت الحكي ما وفاله
وألحين ياللي تسمع الصوت طربان
ارفق على حالي من اللي جراله
يانوف جيتك في رجا عطف و احسان
قلبك ترى قلبي هواه وصفاله
يانوف لدروب الشقا صرت عنوان
صبرت لجلك حيل وأبغا الجماله
حان الوعد يا نوف حان الوعد حان
نكشف نهار الوصل ونوصل حباله
ونعيش لحظه كلها جنان بجنان
وأنسى عنا قلبي وما قد مضاله
ونعيش جو الحب لين إنها تبان
نجمة صبح تعلن نهاية وصاله
وإن كان حظي مثل ما اعتدت خوان
مات العمر ما ظن شي(ن) بقا له
أنا دخيل الله من الحظ لاشان
ما يترك الحال الشقاوي بحاله
بس الرجا باللي كريمن ورحمان
يسعف عليلن مركب الهم شاله
يا نوف جتك بيوت شعري بقيفان
تعطيك عن حالة حبيبك دلاله
وإن ما كفت خذ باقي العمر برهان
وإثبات برهاني جواب وسؤاله
قال السؤال: العمر وش كان يافلان ؟
قلت: "العمركله فداه وفدا له"

يا نوف يبقالك على طول الأزمان
قلبن (رصيده أنتي وراس ماله)

شكرا على القصيد الغزل وننتظر الجديد

اخوك هاوي الجنوب